"Хайрын рекорд" киног Г.Дашхүүгийн дунд хүү Галбаярын GO студи бүтээсэн бөгөөд Д.Галбаяр ерөнхий найруулагчаар нь ажилласан юм.

Баттүвшин, түүний найзууд болох Эба, Баска нар бол хөгжилтэй залуус. Харин тэднийг нэг л өдөр дурлалын салхи нөмрөн авна. Дурлал гэдэг тийм ч амархан тоглоом биш болохоор залуусын амьдрал нэг л мэдэхэд орвонгоороо эргэж тэд бусдын өмнө буруутан болж хувирна. Баттүвшин болон түүний найзууд энэ ойлгомжгүй байдлаас гарахын тулд хайрынхаа төлөө хэрхэн тэмцэж байгааг харуулах инээдмийн романтик кино юм.

"Хайрын рекорд” киноны гол дүрд Ардын жvжигчин Г.Мягмарнаран, гавьяат жvжигчин Ц.Цэнд-Аюуш, Соёлын тэргvvний ажилтан Ж.Оюундарь, Б.Баатархvv, Б.Болдбаатар, Г.Эрхэмбаяр, Улсын драмын эрдмийн театрын залуу жүжигчин Т.Хулан, "Найзууд” театрын жүжигчин, "A Capella” хамтлагийн дуучин Э.Мөнхтөр болон залуу уран бүтээлчид тогложээ.

Ардын жүжигчин Г.Мягмарнаран хэлэхдээ "Би Драмын жүжигчин хүн. Тэр ч утгаараа би энэ киног жүжиг болгохыг их хүссэн. Анх зохиолыг уншиж үзээд, шууд л таалагдсан. Их хөөрхөн, бас их зэвүүн. Ямарваа нэг киног үзэж байхад аан энэ чинь одоо ингэх юм байна гээд таагаад байдаг. Харин энэ кино таах аргагүй, тэр нь их зэвүүн шүү. Кино урлаг маань хөгжиж байна. Энэ залуу үеийнхэн хөгжүүлж байна. Үнэхээр Т.Хулан, Э.Мөнхтөр нар бол мэргэжлийн жүжигчин, залуу хүүхдүүд гэхэд их туршлагатай шүү. Та нар ч мэднэ дээ. Тиймээс энэ баг бүрэлдэхүүнтэй хамтран ажиллахад тааламжтай байсан гэдгээ хэлмээр байна. Түүнчлэн кино бол бизнес. Харин энэ кино бол урлаг юм шүү” гэжээ.

Та бүхэн "Хайрын рекорд" инээдмийн уран сайхны киног үзэж, инээдмийн нэрт мастер жүжигчин аавын авъяас хэрхэн хүүд нь өвлөгдөн анхны дэлгэцийн уран бүтээлээ найруулан тавьсныг үзээрэй.